لو سألنا أولادنا : مين مثلكم الأعلى؟أو لما تكبروا، نفسكم تبقوا زي مين؟؟
ياترى حيقولوا أية؟؟؟
ياترى حيقولوا أية؟؟؟
ويا ترى من حقنا إننا نتخض وتجيلنا زغطة لو سمعناهم بيقولوا تامر حسني (الهارب من التجنيد) أو اللمبي (الهارب من الفواقان) أو هيفاء وهبي (الهاربه من الهدوم) أو الحضري (الهارب من الأهلي) ؟
أو حتى لو قالوا (علشان ماننساش اولاد المدارس الأجنبية الخواجات - بالجيم) لبرون جايمز أوجاي زي أو الأخت بيونسي؟
(ملحوظة: الأهل اللي ولادهم جاوبوا وقالو شخصيات زي : هدى شعراوي، أحمد زويل، فاروق الباز، مجدي يعقوب، نجيب محفوظ، أم كلثوم، محمد غنيم، تهاني الجبالي، صلاح جاهين، سميرة موسى، يوسف إدريس، يوسف شاهين، منى ذوالفقار، محمد عبده، لطيفة الزيات، شاهندة مقلد، نهول،...أو أي شخصية محترمة من النوعية اللي فاتت دي من فضلهم ييجوا على جنب علشان الشتيمة اللي جاية ماتطرتش عليهم). أيه دة، بس دول؟ ألله يكسفكم.
لأ مش من حقنا إننا نتخض ولا نزعل أو نتقمص. لية؟ لإن إحنا (الأهل والمدرسة والإعلام) كلنا مسؤولين عن الخيبة التقيلة دي يا ....@@####&&&$%%%####***** (شتيمة)
يلا كل واحد يبتدي ينمي في ولاده روح الإنتماء والفخر بوطن خرج أعلام في جميع المجالات وقادر إنه يخرج لنا زيهم وأحسن كمان.
أظن كلامي واضح ومش محتاجة أطول عليكم أكتر من كدة!! وكمان أنا مستعجلة علشان ألحق أروح أتفرج على التلفزيون. أصل فية إنترفيوه مع شاكيرا شاكيرا وجورج كلوني.
(تنويه للناس اللي ماعندهاش روح الدعابة، ... بهزر). ء
