فقه النكد

لن أذكر إسم المدينة التي جرت فيها الأحداث التالية، مش خوف، لكن مجرد جبن اللى هو سيد الأخلاق في بلادنا.  لأ بجد مش مهم المكان خالص، لأن اللي حصل يتكرر بشكل أو أخر في كل بلد عربي، وفي الغالب في كل بلد إسلامي كمان.ء

كنا في أجازة قصيرة مع أصدقاء، وكنا قد قررنا أن نقضي اليوم على شاطئ البحر. ولأننا كنا في نهار يوم الجمعة، أقترح زوجي أن نتوقف بالمسجد الكبير بالمدينة ليصلي الجمعة هو وأبني صديقتي اللذان لا يتجاوز عمرهما السبع سنوات.ء

وفعلآ نزلوا هم عند مدخل الجامع وإنطلقنا أنا و صديقتي بالسيارة لنجلس في مكان قريب حتى إنتهاء الصلاة. كانت صديقتي سعيدة لأن الولدان لم يبديا أي أعتراض على تأجيل الذهاب إلى البحر بل على العكس، كانا فرحين بالذهاب إلى الجامع لأداء صلاة الجمعة.ء

لحد هنا والقصة تنفع فيلم عائلي نهايتة سعيدة.ء
ماتستعجلوش. دلوقت حيقلب فيلم رعب.ء

وإحنا في وسط حديث شيق، فجأة إتنفضت صديقتي في مكانها، وفتحت شنطتها لتفحص تليفونها الجوال. وفعلآ لقيناه علي سيلنت ووجدنا ميسد كولز من زوجي ورسالة تطلب منا العودة إليهم فورآ. طبعآ مافيش تفسير للي حصل إلا إن قلب الأم دليلها. طب ما جوزي معاهم، أمال أنا مانطيتش وماتفزعتش ليه؟دة طبعاً لإن مافيش حاجة إسمها قلب الزوجة!!ء
 المهم، لقيناهم قاعدين قدام الجامع على الرصيف زي الغلابة.ء

ماصليتوش ليه ياشباب؟
علشان فيه واحد واقف على باب الجامع - مركزه الوظيفي غير محدد - رفض إنه يسمح لأحد الولدين بالدخول.ء
ليه؟ لأن الشورت اللي لابسه مش مغطي إلا نصف ركبته.ء
 ياسلام!! طب ماأخوه لابس نفس الشورت.ء
يمكن علشان .............................ء
ولا علشان................................ء
 لأ جائز ....................................ء
بااااااااااااااااااااااااس، أرجوكم ماتحاولوش تلاقوا تفسير منطقي لتصرف غير منطقي.ء
عندك حق.ء

للأسف التفسيرالوحيد لتصرف حارس الجامع - اللى فاكر نفسه حارس الإسلام - هو ما كان يطلق علية فرج فودة (ألله يرحمه) فقه النكد.ء

 أعاننا ألله وأعان أبنائنا وأطفالنا على التمسك بصحيح ديننا السمح السهل الجميل في هذا الجو الخانق من الغلظة والتشدد والجهل.ء