شالو ألدو

أول ما قرأت عنوان خبر التغيير ............. خلينا نقول..؟؟.. أيوه التغيير في الفريق الأول لأحدى الفرق الرياضية، شفت أدامي عدة سيناريوهات (مش عارفة إيه حكاية الأفلام معايا الأيام دي).

وكلها كانت في منتهى التفاؤل. ء

سيناريو رقم 1: طبعآ فيه كام لعيب بعد أداءهم اللي زي الزفت، وقلة الحرفنة و اللياقة، وتكرار الأخطاء القاتلة، والغرور المتناهي، والفردية، وعدم الحرص على مصلحة الفريق، والشتيمة في الجمهورإذا إعترض على الأداء، فإن المدير الفني - الي مفروض يجيب البطولات، ويطبق اللوائح، علشان يرضي الجماهير الغلبانة اللي طلع روحها - أخيرآ طلعلهم الكارت الأحمر وكرشهم من الفريق.

سيناريو رقم 2: ياسلام بقي لو المدير الفني يكمل جميلة ويكرش مع المجموعة الي فوق دول شوية اللعيبة اللي يمكن أداءهم مش وحش أوي كدة لكن دم أمهم تقيل أوي على قلب المشجعين.

سيناريو رقم 3: ويبقى يوم الهنا يقى لو المدير الفني سرح الفرقة كلها و أقر بمسؤليتة عن ضعف المستوى الفني والأخلاقي لللعيبة و روح بيتة هو كمان.

سيناريو رقم 4: ويبقى يوم المنا لو إدارة النادي تشرك الجمهورفي إختيارمجموعة جديدة من اللعيبة الجدعان اللي بيحبوا النادي من قلبهم.

والله أنا يا طيبة يا ساذجة يا هبلة.

لما قرأت الخبر، طلع إن المدير الفني إتشطر على لعيب واحد لأنه تجرأ وحاول ينبهة إلي خطوة خطيرة مقدم عليها أكبر خصوم النادي، ولكن المدير الفني طلع عارف ومطنش وكرش اللعيب علشان يكون عبرة لمن يعتبر.

لك الله يا جمهور نادينا الحبيب. التغيير طلع فشنك. حاجة كدة زي سكتش الثلاثي بتاع "شالو ألدو جابو شاهين". والله المفروض الجمهور هوه اللي يهتف و يقول "مانتوش لاعبيين".

أخيرآ أحب أأكد إن البوست دة عن الكورة، كله كورة، ولا شيئ غير الكورة. وإن أي تشابه بين البوست وأحداث معينة حصلت في البلد الأيام ده عبارة عن صدفة بحتة وشكرآ. ء