Monday, November 3, 2008

ذكريات هندسية

سمعت إن والد زميلة لية من أيام الدراسة توفى إلى رحمة أللة. أترحمت عليه، بس بصراحة لقيت نفسي بأبتسم إبتسامة خبيثة لإن زميلتي دي ووالدها كانوا السبب في أسوء (أنيل) يوم ليه في حياتي الجامعية. كنت في إعدادي هندسة وكنت أكتشفت بعد أول يوم دراسة إن الفكرة اللي كانت في راسي عن الجامعة مالهاش أي علاقة بالحقيقة المرة اللي لقيت نفسي عايشة فيها. أول مشكلة هي إن المحاضرات كانت بالعربي و دة ظبعآ طبيعي لمعظم الطلبة، لكن أنا و أصحابي من المدرسة طول عمرنا بناخد الرياضة بالإنجليزي فا ماكناش بنفهم أي حاجة في المحاضرات!! الغريب إني مع كدة عمري مافوت محاضرة!! المهم كان عندنا مادة إسمها هندسة وصفية وكنت بمساعدة والدي (ربنا يخلليهولي) فهمتها وحتى حبيتها. وفي يوم ، كان عندنا إمنتحان نص السنة الشفوي، وكنت داخلة وأنا فرحانة بشبابي لأني مذاكرة كويس وكنت حاسة إني (علي رأي أبني) حدشدش الأمتحان!! كان فيه أتنين معيدين بيمتحنونا، وكانوا بينادوا علينا أثنين أثنين بترتيب أسمائنا الأبجدي. على حظي نادوا علية مع زميلتي لأن إسمها بيبتدي بالنون زيي. فرحت لما المعيدين عرفوا من إسمها إن والدها أستاذ رياضة في الكلية، قلت كدة هي ضمنت الدرجة النهائية، ويمكن كمان توصيهم علية حق االعشرة الطويلة في المدرسة . لكن طلعت نادلة أخدت الدرجة النهائية وطارت. عمومإآ مازعلتش أوي لأإني كنت مذاكرة بجد. الإمتحان كان عبارة عن كروت مرسوم عليها أشكال مختلفة، وكل المطلوب كان إننا نعرف إسم الشكل، وبعدين نجاوب على شوية أسئله عن مساحة وحجم الشكل وحاجات تانية مالهاش أي فايدة في الدنيا. وقفت أودام المعيدين وكلي سلف إستيم وسألوني عن إسمي، والحمد للة جاوبت هوا، وبعدين معيد منهم قاللي ويا ترى حاتجوبي بالعربي ولا سياتك كمان خريجة مدرسة أجنبيه ومدلعة زي الباشمهندسة اللي قابلك و مابتعرفيش غير إنجليزي؟ طبعآ مش محتاجة أقولكم إن السلف إستيم طار وعنية دمعت بس مالقيتش حل غير إني أقوله لا ياباشمهندس، أنا حاجاوب بالعربي. دعيت أن يجيلي شكل سهل و فعلآ الكرت اللي سحبتة كان شكل "كون" . قلت الحمد للة جت سليمة. وبما إني ضليعة في اللغة العربية، كنت محتارة بين كلمتين. ياتري اقول قرطاس ولا طرطور؟ قلت نخليها قرطاس أضمن. وفعلا وبكل ثقة قلت: قرطاس ياباشمهندس!! المعيد: قرطاس؟؟؟ إحنا حنبيع لب ياباشمهندسة؟؟؟؟ قلت: طيب طرطور؟؟؟ المغيد: إنتي بتهرجي معايا و لا إنت فعلا ميحة وأحطلك الصفر وأخلص؟؟ وطبعآ مش محتاج أفول إن الدموع غرقت لبسي والأرض، فالمعيد أتخض وقالي: مالك هو فيه أية؟؟ قلت وأنا بتشحتف: بصراحة أنا مذاكرة كويس أوي بس أنا كنت في نفس المدرسة اللي كانت فيها زميلتي اللي قابلي وكنا بناخد كل الرياضة والعلوم بالإنجليزي. والدكتور في المحضرات قالنا اللي عايز يجاوب بالعربي يجاوب، واللي عاوز يجاوب بالإنجليزي يجاوب!! المعيد: ياعني عارفة إسم الشكل بالإنجليزى؟ قلت: طبعآ دا "كون"، ومساحتة تتحسب كدة، وحجمة كدة ...... مش عارفة إذا كانت الدموع ولا الإجابة الصحيحة هية اللي خالتني أصعب علية فقال:طيب سماح المرة دي، حاديكي النمرة النهائية، بس أوعي أسمعك بتقولي قرطاس ولا طرطور هنا تاني!! و لعلمك الشكل إسمه مخروط. كان عندي رغبة شديدة أستظرف وأقوله: هو إحنا حنبيع ملوخية ياباشمهندس؟؟؟ يس فقلت لنفسي إمشي من وشة بسرعة فبل ما يغير رأيه. اللة يرحمك يا د. ع

4 comments:

Anonymous said...

Well, I got the part "zey el zeft" and "ala fekra" and that is all, even watching Abdel Haleem movie today did not improve my Arabic that much, Lala land is certainly not good for my linguistic skiils.

nahoul said...

Will translate it to you when I see you tomorrow isA. Until then, just take my word for it. Your friend is also linguistically challenged.

Anonymous said...

Nahoul, fazee3a begad, cuz i know who ur talking about ;)
p.s. can u name other shapes in Arabic, i'd be interested to know what u call them
luv,
Noran

nahoul said...

ya Noona rabena satar in magaleesh trapezoid!!! God knows kont 7a2ool eh, khososan in ismo bel 3arabi tala3 shibh mon7arif!!!