Thursday, September 25, 2008

يعني إية صايم

فيه واحد صاحبنا دكتور قلب في نفس المستشفي الي بيشتغل فيها جوزي. أنا معرفوش كويس أوي لكن المرات القليلة اللي قابلتة فيها لاحظت إنه بعكس مظهره الخارجي الجد، دمه خفيف و أحيانآ كمان مسخرة.

فمثلآ كان بيزور جوزي في المستشفى و بعلي كان بيشتكي (كالعادة) من ظلمي له. يعني كان بيقوله:" تخيل إني ضحيت بأول ثلاث أيام من أجازة العيد علشان أقديها هنا مع مراتي اللي خلصت أيام أجازاتها، ومش حسافر و أسيبها إلا في رابع يوم ولمدة إسبوع بدل عشر أيام. وبدل ماتشكرني تقولي:’ أكيد ملاقتش مكان في الطيارات إلا بعد العيد!!!’ شايف الظلم و الإفترا بتاع مراتي!!!"

صاحبنا ماردش و فضل يدور في جيوبه على حاجة. إستعجل جوزي الرد و قاله: "ماردتش ليه؟ وبتدور على إية في جيوبك؟؟"
رد صاحبنا:" بدور على منديل علشان أمسح دموعي. قطعت قلبي يا راجل."

طبعآ أنا كنت في قمة السعادة لإن راجل، و مصري و كمان صاحب جوزي أخد صفي. وكمان عمل كدة بدم خفيف خلص الموضوع في ثانية و من غير مايدي جوزي أي مجال للرد.

لكن أناماكنتش عايزه أتكلم عن صاحبنا علشان أقول نكت لكن علشان أكرر حكمة جميلة أوي أوي قلها من يومين لما قابلناه صدفة. كنا بنتكلم علي بعض الناس الي مخها لامؤخذة ظلطة واللي بتصمم تصوم بالرغم من إن حالتها الصحية ممكن تسوء بالصيام.

بعد ما أكثر من شخص كرر الكلام اللي كلنا عارفينة، صاحبنا دة (يظهر إنه متخصص في المختصر المفيد) قال: " أنا شخصيآ لما بيجيلي حالة ممكن يضرها الصيام بقوالها: خليك صايم بس كل و إشرب!"

من سهوله وبساطه العبارة، مافهمتهاش على طول. لكن يعد ما كررت اللي قالة في دماغي الحمد لله فهمت. فعلآ ليه دايمآ مركزين على الإمتناع عن الأكل و الشرب و بننسى إن الصيام دة أساسآ إمتناع عن الشر و تشجيع للخير اللي جوانا. ليه فاكرين المعنى الظاهري و ناسيين الحكمة الأوسع للصيام. مسلمين كتار مايقدروش يصوموا علشان المرض، السفر، لطبيعة العمل، أو لصغر أو كبر السن. لكن ما قيش حد عنده أي حد حجة إنه مايصومش عن المعاصي و أذية الناس.
يبقى مين اللي أهم ؟
ينصر دينك يا دكتور يا مختصر يا مفيد

2 comments:

Anonymous said...

allahom selli 3la alnabi demek zi al3sel fi al3rebi,shwaia 3erbi 3lshan alghlaba alli mara7oosh al EGC

Hina wi Hinak said...

الصيام أكيد موش بس الإمتناع عن الأكل والشرب... فزي ما قاتي، وزي ما أغلبنا بيعرف، المسلم لما بيصوم، لازم علشان يصح صومه يمتنع عن فعل أو قول أي شيء فيه شر أو معصية، بس لازم برضه يصاحبه بإمتناع عن الأكل والشرب... طبعا ربنا علشان هو الرحيم، أحل لبعض الناس أن يفطروا، ومنهم المريض والمسافر... ممكن طبعا أن يصوموا لو إستطاعوا... بس لو ده هيضر بصحتهم جدا، فالعقل يقول إنهم يفطروا... للأسف صيام أغلبنا أصبح الآن صياما عن الأكل والشرب فقط