من الأشياء اللي كرهتني في مشاهدة التلفزيون، طبعآ دة غير هيافة البرامج، وملل المسلسلات، وكأبة الأخبار، وثقل دم المذيعين، الخ الخ.........هي التيكر، او شريط الأخبار اللي العقل المصري طوره وجعله شريط معاكسات و إعلانات نصب.ءمن نماذج الإعلانات المزعجة:ء
إعلانات عن رنات لمسحراتي عمولة يصحي كل واحد بإسمه. طيب مافيش إعلان عن واحد يصوملهم بالمرة؟ ء
إعلانات عن تليفون للفتوي اللي أكيد برضه هيكون لفتاوي عمولة . دة بيأكد إن أحسن بزنس في مصر دلوقت هو الموبيل و الدين.ء
إعلانات عن تيلفون إنسان منافق بيقول عن نفسه إعلامي إسمة خط الفضفضة مستعد يقعد يكلمك في أي وقت. في الغالب إسم الخط نسبة إلى فضفضة جيوب المغفلين اللي حيكلموه .
إعلانات عن تيلفون لخبيرة الموضة والتجمبل علشان تقولك إزاي تلبسي البوصة تبقى عروسة. الغريب إن الخبيرة نفسها شبه أمنا الغولة!!
إعلانات عن تيلفون لخبيرة التخسيس اللي حتخليكي تخسي ثلاثين كيلو في إسبوع. والعجيب إن خبيرة التخسيس دي نفسها لسه طالعة من عملية شفط للدهون.
أما أخطر إعلان، فبيقول لو إنت حامل وعايزة نصائح عن الحمل والولادة إتصلي برقم كذا.ممكن يجيلي سبهللة لو فعلآ فيه حوامل ممكن يستشيروا ويخدوا نصايح من واحد ماعندهمش أي فكرةعن مؤهلاتة. ممكن يكون قائد طابية، أوحتى بياع بليلة، مش مهم. المهم إنه عنده موبيل و نمرة. والله عيب عليكم. بس كمان العيب في عدم وجود قانون يمنع الإسفاس دة. أو يمكن (كالعاده) القانون موجود لكن لايطبق.
والله أنا خايفة لو التهريج دة إستمر، إن السنه الجاية نلاقي إعلان بيقول: لو إنت مش حامل وعايزه تحملي، قابليني النهاردة الساعة 8 في شقتي، واحد شارع المقرننين.
يا مثبت العقل والدين يا رب.ء
No comments:
Post a Comment