خدعونا فقالوا إن سبب الوساخة والتخلف والفقر اللي في البلد هو الإنفجار السكاني!! وأنا كنت عبيطة ( أو بستعبط ) و مصدقة الكلام دة لحد ما رحت الصين.لقيت نفس الزحمة اللي عرفاها في شوارع مصر بس من غير وساخة!! إستغربت خالص مالص و قلت هم صحيح إخوانا الصينيين بياكلوا كل حاجة وأي حاجة ومابيرموش أي جزء من أي نبات، حشرة، أو حيوان، بس برضة فين الورق و البلاستيك اللي مفروض يكون في الشارع؟
وشفت نفس الزحام في محطات المترو والقطارات بس من غير هرجلة ولا زق ولا تحرش ولا بهدلة!!! برضة إستغربت و قلت أمال إية كل الكلام الفارغ دة علي ثقافة الزحام و العدوانية الخزعبالية المحورية الناتجة عن قسمة عدد أفراد الأسرة علي متوسط سعر متر الأرض في العتبة الخضراء اللي الخبراء دوشونا بيها دي؟؟ الناس دي منظمة و محترمة بعض كدة إزاي؟؟؟
وبالرغم من الأعداد المهولة من البشر، ماشفتش ناس بتتسكع في الشوارع ولاشفت عواطلية. كل واحد وواحدة ماشين عارفين دورهم في النهضة الصينية. حتى بنات الفوت مساج. كل واحدة دارسة شغلها وعارفة هى حتلعب في أي صباع بالظبط. إتعجبت و قلت أمال إحنا مش عارفين نشغل الكام مليون اللي عندنا لية؟
يامصرييييييييييين!!! علي رأي أم كلثوم : " العيب فيكم وفللي حاكمكم، أما الصين ياروحي علية." ء
