Friday, September 26, 2008

بلاش دلع

العمود ده جيكون مختلف شوية عن كل العواميد السابقة لأنه :

بألعربي ، مافيهوش شتيمة في الحكومة ، فيه شتيمة في الشعب

إتغظت أوي و مرارتي إتفقعت لما شفت تقرير تلفزيوني مع طلبة و طالبات مصر، أملنا في مستقبل مشرق ، بمناسبة بدأ العام الدراسي.

إحتج الجميع على بدأ الدراسة قبل 10 أيام من إنتهاء رمضان. كله عايز الدراسة تبدأ بعد العيد. الكل أجمع على إن الصيام و الدراسة عاملين زي الحشرات و ديكسان (مبيد الحشرات الأشهر على أيامي) يعني لا يمكن يجتمعوا أبدآ في مكان. وإكتشفت كمان إن فيه فايس بوك جروب بتدعو إلي مقاطعة الدراسة.

إيه العيال الخرعة دي؟ و إيه الفكرة المنيلة بستين نيلة الي واخدينها عن الصيام دي؟

مين الجحش الي فهمهم إن رمضان سهر للفجر ونوم طول النهار؟و متابعة مسلسلات تجيب التخلف؟ طيب وكان لزمتة إيه أصلآ لو هية الحكاية كدة؟

أنا متاعطفة مغ الطلبة و الطالبات 100% لو الشكوى كانت من المناهج، من مستوى أو إنعدام الشرح و الدراسة في الفصول، من منظومة التعليم الفاشلة الي متسرش أي حبيب (أنا متأكدة إن العدو سعيد جدآ بالفشل دة). أو لو كان إحتجاجهم تعاطفآ مع الأهل لزيادة الأعباء المادية عليهم والصاريف في الوقت دة من السنة.

ولكن الإحتجاج برمضان و الصيام؟ وصعوبة السهر و الحصيان بدري للدراسة؟ دي بصراحة قلة أدب و فشل كامل في فهم الدين .

ياحبايبي يا حلوين، رمضان دة مفروض يدي المؤمن طاقة و دفعة للإنتاج و الإنجاز أكتر من أي وقت تاني في السنة. ولو إني مش غاوية حروب، لكن ممكن نفكر نفسنا بالجيوش الي حاربت في رمضان في معارك مهمه زي بدر و فتح مكة و حطين. و أتعب نفسي معاكم وأكلمكم على بطولات قديمة و موجودة بس في كتاب التاريخ بتاع السنة الي فاتت و الي بكل إستهتار وقلة أدب قطعتوة ميت حتة بعد إمتحان التاريخ ليه؟ خلينا في حرب رمضان(أكتوبر 73) اللي أكيد كل واحدة وواحد فيكم له قريب، أو جار، أو صديق إشترك فيها. ما هي سموها حرب رمضان مش علشان ده إسم موسيقي عجب السادات فقال "إيه رأيك يا جيجي؟ نسميها حرب رمضان؟"، ولكن إسمها كدة علشان هيه كانت في شهر رمضان وجنودنا البواسل رجعولنا أرضنا و هم صايمين.

الحمد لله أنكم ماكنتوش في صفوف الجيش يومها وإلا كان زمانكم بتتدرسوا بالعبري .واللهم ما إني صايمة

ملحوطه: سلام و تحية للطلاب (همه عارفين نفسهم) اللي عايشين في الغربة وحدهم و اللي المغرب عندهم قرب 8 مساء واللي أهلهم قاللهم إن ممكم يفطروا علشان يقدروا على المجهود الكبير دة ولكن بعضهم بيصوم معظم رمضان و مش بيتحجج بالصيام علشان يكون فاشل و تنبل وشكرآ

3 comments:

Anonymous said...

Do u honestly think that all your readers can read Arabic?

nahoul said...

No, but I have to do this to encourage my Arabic readers to stay tuned.

p.s. remind me to teach you Arabic when I see you.

Anonymous said...

i really enjoyed reading your last 2 arabic parts ,i feel more attached to the subject especially if u are writing about arabic country so why you donot write in english about foreign countries or general subjcts and in arabic if u write about arabic countries,what about that !! i know its not easy for you but if u can make it and translate to arabic will be fine,ba al3rbi keda shwaia 3rebi rebna yekremek .