Friday, January 1, 2010

ولا بالأحلام

إذا كان اللي بنى مصر في الأصل حلواني، فأنا لازم مصريه أصيلة. مش بس بموت في مصر، كمان بموت في الحلو بطريقه مرضيه.ء

طيب بحب مين أكتر؟ مصر ولا صنية كنافة مخرفشة ومحشية كريمة أو مكسرات؟ أيه السخافة دي؟ طبعآ مصر - مصر هي أمي

طيب فطيرة تفاح سخنة وعليها أيس كريم فانيليا؟ ليه الإحراج دة بس؟ لأ برضة مصر - نيلها جوة دمي

طيب تورته شوكولاته، وياسلام لوكانت تشوكولات موس؟  ...... بقولكم إيه، ما بحبش أتكلم في السياسة!!ء

طبعآ مش عايزة نباهة إن الحب دة عاملي مشكلة، لإني بالرغم من مواظبتي على الرياضة، وشربي للشاي الأخضر كل صباح، وألتزامي بمعظم التعليمات الخاصه بالأكل الصحي، لكن مش عارفه أتخلص من ثلاث، أربع، قولوا خمس كيلو جرامات زياده عن الوزن اللي نصحني به الأطباء خصوصآ مع مشاكل ضهري. ء

فكرت في حل مبتكر للمشكلة. قلت يمكن لو تابعت برامج إعداد الحلويات على التلفزيون، يمكن أزهق من الحلو وأكره. ولو الخطه دي منفعتش، أكيد الشف حتكون تخ......مش رفيعه، فبرضه أكره الحلو. ولو الخطه دي كمان بعد الشر فشلت، فأكيد لما أشوف قذاره وكركبه المطبخ بعد تحضير الحلويات، حأكره الحلو، وسيره الحلو، وظلم الحلو لكل أصحابه.ء

الخطه نجحت؟ للأسف فشل زريع!! والسبب: الشف نرمين مقدمه برنامج ولا بالأحلام على قناة فتافيت: الحياة حلوة!!ء

أولا: كل صنف حلو بتعمله أحلى ومختلف تمامآ عن اللي قبله، وكل حلقه، أجمل من اللي قبلها، يعني مافيش مجال للزهق أبدآ. ده أنا حتى بتفرج على الإعادة!!ء
ثانيآ: الشف طلعت أرشق مني ميت مرة.ء
ثالثآ: مطبخها زي الفل، وفي أخر كل حلقة، بتكون بنفس النظافة والشياكة زي أول الحلقة. ولما يتقلع المريلة وتعلقها، لازم تساويها. يعني كمان طلعت فلة!!ء

وطبعآ ماحدش يقدر يلومني لو قلت إني مابحبش الشف نرمين علشان بوظتلي كل خططي!!ء
لكن في الحقيقة أنا معجبة بيها جدآ وبحبها جدآ جدآ ونفسي لما أكبر أطلع شف قد الدنيا زيها، ويعملولي على قناة فتافيت برنامج إسمه ولابالكوابيس!! (أعتذر لسرقة الأفشة دي من إبني علي).ء

على فكرة، العصفورة قالتلي إن النهاردة عيد ميلادها. كل سنة وإنتي طيبة يا أشطر وأشيك وأنظف شف في الدنيا.ء

1 comment:

Anonymous said...

I totally agree with u in every single word ya Nahoul, plus the fact that Nermine is so relaxed and makes cooking all those desserts seem like a piece o' cake! w kaman u could tell enaha bent nas awy ...
Happy Birthday, Nermine! Can't wait till you start with starters and main courses :)
Noran